Талғар ауданында Талғар ЭТА-ның жаңа әкімшілік ғимараты салтанатты түрде ашылды

Талғар ауданында “Алатау Жарық Компаниясы” акционерлік қоғамының Талғар электр тораптары ауданына қарасты жаңа әкімшілік ғимаратының салтанатты ашылу рәсімі өтті.

Аталған нысан заманауи құрылыс және техникалық талаптарға сәйкес бой көтеріп, электр энергиясын тарату жүйесінің сенімділігін арттыруға, сондай-ақ тұтынушыларға көрсетілетін қызмет сапасын жақсартуға бағытталған. Жаңа ғимарат қызметкерлер үшін қолайлы еңбек жағдайларын қамтамасыз етіп, өндірістік үдерістердің тиімділігін арттыруға мүмкіндік береді.

Салтанатты шараға жергілікті атқарушы органның өкілдері, тұрғын үй-коммуналдық шаруашылық саласының мамандары, компания басшылығы мен қызметкерлері қатысты. Іс-шара барысында сөз сөйлеген қонақтар жаңа нысанның ауданның инженерлік инфрақұрылымын дамытудағы маңызын атап өтіп, оның өңірдің әлеуметтік-экономикалық дамуына қосар үлесін жоғары бағалады.

Шара аясында салтанатты түрде лента қию рәсімі өткізіліп, қатысушылар жаңа ғимараттың материалдық-техникалық базасымен және жұмыс кеңістігімен танысты.